جون ناش.. عالم رياضيات أمريكي مشهور.. صاحب الـ Nash Equilibrium اللي يعتبر من أساسيات نظرية اللعبة Game Theory واللي له إسهامات في نظريات وشغل كتير في مجال الرياضيات واللي بسببه حصل على جايزة نوبل.
اللي شاف فيلم A Beautiful Mind .. اللي جسد فيه راسل كرو شخصية جون ناش.. هيبقى عارف إنه كان بيعاني من بارانويا وسكيزوفرينيا.. بالرغم من عبقريته في الرياضيات إلا إنه كان بـ “يهلوس” ويعيش في “ضلالات” في أوقات كتير.. وفي بدايات تشخصيه كان بياخد أدوية علاج نفسي وبيدخل المستشفيات كتير.. لكن مع الوقت ومن 1970 لحد ما مات في 2015.. ما أخدش أدوية ولا دخل مستشفيات تاني.
كان عادي جدا إنه يواجه سخرية ورفض وخوف منه بسبب مشاكله النفسية.. لكن شغله واسهاماته في مجاله كان لها تطبيقات كتير والبشرية استفادت منها.
شات جي بي تي.. أو الـ LLMs عموما.. هي نماذج ذكاء صناعي تم تدريبها على كمية كبيرة جدا من البيانات والمعلومات عشان تأدي وظيفة محددة في مجال معالجة النصوص.. وهي توقع الكلمة اللي جاية في أي نص.. يعني لما تكتب جملة ما.. النموذج بيتوقع الكلمة اللي بعدها.. ثم اللي بعدها ثم اللي بعدها.. وهكذا.. لحد ما يتكون نص كامل بدايته الجملة اللي حضرتك كتبتها.
جودة النص المتوقع وواقعيته.. بتعتمد على عوامل كتير.. من أهمها خصائص وجودة البيانات اللي تم تدريبه عليه.. لو تم تدريبه على بيانات معظمها متفبرك.. فهتكون اجاباته معظمها متفبرك برضو بحسب القاعدة المشهورة Grabage i, garbage out!
لما احنا كعرب بنحاول نتعلم حاجة جديدة.. بنلاقي إن المصادر الإنجليزي أحسن بكتير من العربي (للأسف) وإن المحتوى العربي ضعيف على النت ومليان (هبد)!
لو البيانات اللي بالعربي اللي اتدرب عليها النموذج اللغوي مليانة أخطاء وهبد.. فماتتوقعش إنه يفرق بين الحقيقة والهبد من نفسه.. وطبيعه إن إجاباته تبقى مليانة هبد هي كمان.
طب لو النموذج اتدرب على كمية ضخمة من البيانات بشكل يخليه يقدر يتميز في مجموعة كبيرة ومتنوعة من المعارف والعلوم ويعدي أكتر من 30 امتحان رسمي فيهم بدرجات تقارب الإمتياز.. بس في نفس الوقت ما بيعرفش يقول لا.. وبيهبد أحيانا لسبب أو لآخر.. وفي نفس الوقت برضو.. الموضوع لسة في بدايته ومعدل تطوره عالي جدا بشكل مخلينا مش عارفين نتوقع هو هيقدر يعمل إيه تاني في الشهور اللي جاية!
البشر متوزعين احصائيا توزيع طبيعي Normally Distributed تحت منحنى جاوس Normal Distribution Curve.. فلو حاجة ثورية زي الـ LLMs وشات جي بي تي ظهرت بما لها من تطبيقات وأثر كبير على حياتنا.. هتلاقي حوالي 2% من البشر على أقصى الطرف اليمين بيدافعوا بشدة عنها ومتطرفين في إيمانهم بيها وإنها هتخلي حياتنا يوتوبيا! .. وزيهم على أقصى الشمال بيشككوا فيها وبيهاجموها ويتريقوا عليها.. والـ 96% اللي فاضلين بيتدرجوا ما بينهم.. شايفين إنها تقنية لها ما لها وعليها ما عليها بدرجاتهم.
لو كل الناس كانوا مفرطين في التفاؤل والإيمان بجون ناش وسمعوا كلامه في كل حاجة.. كان زماننا كلنا دلوقت مصدقين وعايشين نفس الهلاوس بتاعته.. ولو كل الناس كانوا مفطرين في السخرية منه والتريقة عليه.. ماكانش حد استفاد من شغله في المجال اللي هو عبقري فيه.. لكن عشان القطاع الأكبر من البشر بيحاولوا يحكموا عقلهم.. وياخدوا الصالح ويرموا الطالح.. فاحنا استفدنا من شغله.. وهو اتعالج واستقر!
دايما حنا كبشر هنفضل تحت نفس التوزيع دا.. دايما هيبقى فيه المتطرف في التشكك والمتطرف في التصديق.. والأعم الأغلب متوزعين ما بينهم بدرجات.. لكن مصير وحياة كل واحد مرهونة دايما بقراره الفردي.. ووعيه اللي بيحدد مكانه تحت المنحنى!
شات جي بي تي ونماذج معالجة اللغة المتطورة والـ AI عموما.. هي مجرد شكل آخر لحكاية جون ناش.. نفس المضمون مع اختلاف الشكل والتفاصيل.. جاءت لتبقى.. وهتطور أكتر.. وهتبقى أدق وهتكتسب قدرات أعنف.. قرارك في قبول دا والتعامل معاه هو اللي هيحدد شكل حياتك اللي جاية.. فحاول تلاقيلك مكان في نص المنحنى.. عارف تصدق إيه وتستفيد منه إزاي.. وإمتى تنتقد وترفض.
والنصيحة العامة في استخدام شات جي بي تي.. اتعلم إزاي تسأله وتستخدمه Prompt Engineering.. والإجابة اللي تطلعلك فكر فيها بشكل نقدي وحاول تتأكد منها.. خاصة لو السياق يستدعي دا.. لكن رفض النتايج في عمومها ومحاولات التشكيك فيها والسخرية منها.. مش هيضر التكنولوجيا ولا هيمنع تطويرها.. هيضرك انت في تخلفك عن الركب وتأخرك في استخدامه لصالحك.. الموديل مش هيزعل لما تحور عليه وتروح تسأله سؤال معين عشان تاخد الهلوسة بتاعته سكرين شوت وتشيرها وتتريق عليه.. إنت اللي هتزعل والله 
في الختام.. دي مجرد شوية خواطر بفكر فيها وحبيت أشاركها بالرغم إنها مش مترتبة كفاية.
جايزة مانشستر السنوية.. مليون دولار لأبحاث الذكاء الصناعي
الموضوع مش مجرد الجايزة بس.. وزير خزانة بريطانيا أعلن عن شوية حاجات كجزء من خطة استرايتجية…