جايزة مانشستر السنوية.. مليون دولار لأبحاث الذكاء الصناعي

الموضوع مش مجرد الجايزة بس.. وزير خزانة بريطانيا أعلن عن شوية حاجات كجزء من خطة استرايتجية للذكاء الصناعي.. والجايزة دي جزء صغير منها.

اللإستراتيجية دي بتتضمن استثمارات بقيمة 900 مليون جنيه استرليني (يعني أكتر من مليار دولار) لبناء كمبيوتر فائق Exascale Supercomputer مش موجود زيه غير واحد بس اسمه Frontier في أمريكا.

هيتم استخدام الكمبيوتر دا في أبحاث الذكاء الصناعي وتدريب نماذج كبيرة ومعقدة للوصول للي سماه “BritGPT” عشان ما يتخلفوش عن ركب الشركات الكبيرة والدول “خاصة الصين” في التطبيقات المختلفة للذكاء الصناعي.

والجزء التاني هو جايزة المليون جنيه استرليني كل سنة ولمدة عشر سنين واللي هيسموها “جايزة مانشستر” تيمنا ب “Manchester Baby” اللي طلع سنة 48 وبيعتبر من أوائل أشكال الكمبيوتر اللي نعرفه دلوقت.

الجزء التالت من الإستراتيجية دي.. هو الإعلان عن استثمارات بقيمة 2.5 مليار جنيه استرليني (أكتر من 3 مليار دولار) في مجال الحوسبة الكمية Quantum Computing في خلال العشر سنين اللي جايين.

—

الإستراتيجية دي كده بتغطي محورين مهمين من الـ 3 محاور الرئيسية اللي بيقوم عليها التقدم في المجال دا.

أولهم محور الـ Computing Power الكبيرة اللي بتحتاجها نماذج الذكاء الصناعي عشان تحقق نتايج.. اتغطت على المدى القصير ببناء Super Computer.. وعلى المدى الطويل بالإستثمار في أبحاث الحوسبة الكمية.

وتانيهم محور.. الخوارزميات والأبحاث والنماذج نفسها.. اللي اتغطى بجايزة مانشستر اللي هتبقى هدف لفرق الباحثين من كل حتة.

—

الخطة طموحة.. والإستثمارات مش قليلة.. وانضمام حكومات للشركات الكبيرة هيشعلل السباق.